Bliede!

Vergang'n wèke was 'n biezundere wèke! Dönderdag was 't zowied: 't Nedersaksisch wör 'n officiële taole. 't Was op 't neis, 't stön in de kraant'n en a'j in de trein naor Hassen of Enske gung'n he'j 't heurt van de conducteur. Veur dizze reize wör alles in 't plat zegt: 'A'j in Möppelt mut wea'n mu'j d'r hier neudig uut…' A'j 't me'j vraogt mag dat altied, veurbij Amersfoort: 't ummeroep'n in de trein of op de stations, de bord'n an de weg, alles in 't plat. Want noe bi'w geliek an de Friez'n – en we'j bint mit meer!

Zowat vief miljoen mènsen an dizze en gunne kaante van de Duutse grènze praot ien of aander plat dat ze Nedersaksisch nuumt. Vief miljoen – den mu'j nie hoe'm voer'n. En as ze allemaole deur mekaar rebbelt heur-ie d'r ok niks van. 't Is ok nogal 'n ruum begrip, dat Nedersaksisch. As ik naogao hoeveul verschil d'r al zit tuss'n 't Middendrènts (waor de vrouwe wegkömp) en 't Oegeviens – en dan praote we'j oaver vieftien kilomèter. Oen 'uus is daor: je hoes, en 'n magie wördt daor zomaor 'n wicht. Maor goed, vanuut Haarlem beluusterd liekt 't op mekare.

De luu hier lacht oes seins uut um oons accent – dat nuumt ze koddig. Maor 't lèvert altied 'n achterstaand op. 't Mooie is dat 't noe ies niet allent maor vanuut Holland bekeek'n giet wörd'n. 't Ollands giet toch al mangs achteruut, 't wördt zachiesan verdröng'n deur 't Engels. Dat we'j Drent'n, Sallanders, Twenten, Grönnigers en wat er al niet nog meer Nedersaksichs prat oes wat terugtrekt op oons plat is daorumme niet vrömd. Nederland is ok niet meer as 'n verzamelname. We'j bint 'r in 1815 mit 'n allen infrömmelt, dus zu'j d'r toch ok weer uut könn'n.

Ik heb noe toch tied zat, ik gao me'j stark maak'n veur een Drexit. We'j hebt hunebedd'n, we'j hebt 't Asser museum, d'r lig hier of daor nog wat törf en een ressie eulie, me'j dunkt: daor he'w genog an. En 's zomers ko'j mit 'n allen fiets'n in Drente. Veurlopig holle we'j de euro.

Neem-ie wel oen paspoort'n mit? En Google translate…

Eppe van der Weide (van Aor'nd mit Beekie)